पोखरा

पोखराको न्यूरोडमा बुधबार बिहान ८ बजे सभागृहचोकबाट चिप्लेढुंगा आउँदै गरेको ग१६प ७३२४ नम्बरको स्कूटरलाई ग१७प ६६२८ नम्बरको स्कूटरले पछाडिबाट ठक्कर दिंदा दुर्घटना भएको छ । 

दुर्घटनामा निर्मलपोखरीकी सम्झना पौडेल सामान्य घाइते भएकी छन् । पौडेल एक्सपर्ट एजुकेशन एण्ड भिसा सर्भिसमा कार्यरत कर्मचारी भएको बुझिएको छ । ठक्कर दिने स्कूटर चालक दीपकराज झा भएको बुझिएको छ । उनी न्यूरोडस्थित अलब्राइट एकेडेमीमा अध्ययनरत विद्यार्थी हुन् ।

एक्सपर्टमा कार्यरत सम्झना पौडेल स्कूटर लिएर कार्यालय आउँदै थिइन् । उनी भाटभटेनी क्रस गर्नेवित्तिकै जेव्राक्रसबाट विपरित साइडबाट निस्किएको ग१७प ६६२८ नम्बरको स्कूटरले ठक्कर दियो । दुबै स्कूटर र स्कूटर चालक सडकमै पल्टिए । उनीहरुलाई स्थानीयले उठाएर सडक किनारमा ल्याए ।

त्यहाँ समस्या समाधानका लागि पहल हुँदै गर्दा ठक्कर दिने स्कूटर चालक झाले निकै ठूला कुरा गरेर प्रहरीलाई बोलाए । स्थानीले सवारी चालक अनुमतिपत्र हेरौं भन्दा झाले छैन भन्ने अभिव्यक्ति दिएका थिए । प्रहरी केही समयमै आइपुग्यो । प्रहरी आउने वित्तिकै झा त्यहाँबाट स्कूटर छाडेर हिंडे ।

उनलाई प्रहरीले नै त्यहाँबाट भगाएको भन्दै स्थानीय आक्रोशित भए । स्थानीयका अनुसार झाका आफ्नै बुबा प्रहरी गण विरौटामा कार्यरत सइ महेश झा प्रहरीमै कार्यरत रही त्यही घटनास्थलमा आएर उनले नै आफ्ना छोरालाई भगाएको स्थानीयको आरोप छ ।

दुर्घटना हेर्दा सामान्य देखिन्छ । तर त्यसको लफडा निकै ठूलो छ । बिहान ८ बजे दुर्घटना भए पनि दिउसो १ बजेसम्म पनि घटनास्थलमा लफडा जारी छ । अप्रिय घटना हुन नदिन वडा प्रहरी कार्यालय बैदामबाट सुरक्षाकर्मी तैनाथ गरिएको छ ।