पोखरा

विपरीत दिशाबाट आएका दुईवटा मोटरसाइकल आपसमा ठोकिँदा दुई जना सख्त घाइते भएका छन् । पोखरा-बागलुङ राजमार्गअन्तर्गत बागलुङ नगरपालिका १ को गणेश घुम्तीमा बिहीबार दिउँसो दुई मोटरसाइकल आपसमा ठोकिएका थिए ।

मालढुंगादेखि बागलुङ आएको ध १ प ३३२ नम्बरको मोटरसाइकल र बागलुङदेखि मालढुंगा जाँदै गरेको ध २ प २१९७ नम्बरको अर्को मोटरसाइकल ठोकिँदा घटना भएको प्रहरी नायव उपरीक्षक गंगाबहादुर थापाले बताए ।

घटनामा दुवै मोटरसाइकलका चालक घाइते भएका हुन् । घाइतेमध्ये कुश्मा नगरपालिका १० पिपलटारीका २३ वर्षीय रोहित भुषालको खुट्टा भाँचिएको छ भने बागलुङको काठेखोला गाउँपालिका ५ बिहुँका १९ वर्षीय मनिष क‍ँडेलको शरीरभरि चोट लागेको छ ।

भुषालको धौलागिरि अस्पतालमा उपचार भैरहेको छ । कँडेलको भने प्राथमिक उपचारपछि पोखरा रिफर गरिएको छ । घटनाबारे प्रहरीले अनुसन्धान गरिरहेको थापाले जानकारी दिए ।