पोखरा

नेपाली कांग्रेसको रामचन्द्र पौडेल पक्षले प्रक्रिया छोट्याएर महाधिवेशन गर्न माग गरेको छ।

पौडेल समूहले भदौ २३ गतेपछि पार्टीको वैधानिकता समाप्त हुने भएकाले चाँडो नयाँ कार्यतालिका ल्याउन माग गरेको हो ।

नेता प्रकाशमान सिंहको निवास चाक्सीबारीमा बिहीबार बसेको समूहको बैठकले चाँडोभन्दा चाँडो क्रियाशील विवाद टुंग्याएर नयाँ कार्यतालिका ल्याउन संस्थापन समूहसँग माग गरेको हो।

भदौ २३ गतेपछि पार्टीको वैधानिकता समाप्त हुने र त्यहाँ भन्दा पछि महाविधेशन गर्ने विकल्प पनि नभएको निष्कर्ष भेलाले निकालेको छ। भेलापछि वरिष्ठ नेता रामचन्द्र पौडेलले २ दिनभित्र क्रियाशील विवाद टुंग्याएर निर्वाचन समितिलाई महाधिवेशनको प्रक्रिया अघि बढाउन नेतृत्वले निर्देशन दिनुपर्ने बताए।

भदौ २३ भित्र नयाँ कार्यसमिति आउन नसके वर्तमान कार्यसमितिको वैधानिकता समाप्त हुने भएकाले विषेश महाधिवेशन गर्ने एउटा मात्रै विकल्प रहेको पौडेलको भनाइ छ।