पोखरा

तनहुँको आँबुखैरेनी गाउँपालिका वडा नं. २ स्थित खानीखोला पुल नजिकैको सडक भासिँदा पृथ्वी राजमार्ग अवरुद्ध भएको छ ।

पृथ्वीराजमार्ग अन्तर्गत मुग्लिङ–पोखरा सडकखण्ड निर्माणको क्रममा सडक भासिएपछि राजमार्ग अवरुद्ध भएको हो । आज बिहान करिब १० बजेदेखि अवरुद्ध उक्त सडकखण्ड हालसम्म पनि मर्मत नहुँदा सडक अवरुद्ध भएको प्रहरीले जनाएको छ । सडक भासिँदा पुलमा पनि असर पुगेको छ । 

साना सवारी साधनलाई वैकल्पिक बाटोबाट गन्तव्यमा पुग्न आग्रह गरिएको जिल्ला प्रहरी नायब उपरीक्षक युवराज खड्काले जानकारी दिए । अहिले माटो हालेर सडक पुर्ने काम भइरहेको र यातायात सञ्चालन गर्न करिब दुई घन्टा लाग्ने अनुमान गरिएको छ । सडक अवरुद्ध हुँदा गन्तव्यमा हिँडेका सयौं सवारी साधान सडकमा अलपत्र परेका छन् ।