पोखरा

पोखराबाट तनहूँको दमौलीतर्फ जाँदै गरेको ग१ख ४२१५ नम्बर को यात्रुबाहक बस तनहूँको व्यास नगरपालिका वडा नं. ५ कन्टारस्थित पृथ्वी राजमार्गको चापाघाट मोडमा दुर्घटना हुँदा ९ जना घाइते भएका छन् ।

विपरीत दिशा आइरहेको ट्रकलाई साइड दिनेक्रममा बस १२ फिट तल झरेको गण्डकी प्रदेश प्रहरी कार्यालय पोखराले जनाएको छ ।

बस सडक भन्दा तल रहेको स्थानीयको घरको आँगनै पुगेको छ । घर भने सुरक्षित छ ।

बसमा सवार ९ जना घाइते भएकामा १ जनाको अवस्था गम्भीर छ ।

पोखरा ल्याइएका घाइतेमध्ये पाँच जनाको पोखराको चरक मेमोरियल अस्पताल र गम्भीर घाइते भएकी अप्सरा पौडेलको मेट्रोसिटी अस्पतालमा उपचार भइरहेको तनहूँ प्रहरीका डिएसपी युवराज तिमिल्सिनाले जानकारी दिए ।

गाडी चालकलाई सामान्य उपचारपछि प्रहरीले नियन्त्रणमा लिएको उनले बताए । घटनाको विषयमा थप अनुसन्धान भईरहेको गण्डकी प्रदेश प्रहरी कार्यालय पोखराका प्रहरी वरिष्ठ उपरीक्षक नरबहादुर केसीले जानकारी दिनु भएको छ ।