पोखरा

गण्डकी प्रदेशको राजधानी पोखरामा दिनप्रतिदिन कोरोना संक्रमित बढ्दै जाँदा सरकारी अस्पताल भरिन थालेका छन् ।

कोरोना परीक्षणको ५० प्रतिशत भन्दा बढीलाई पोजेटिभ देखिएको कास्कीको बरिष्ठ जनस्वास्थ्य अधिकृत बाबुराम आचार्यले बताए । उनकाअनुसार दैनिक संक्रमण र मृत्यु दर बढिरहेको छ ।

विहीबार मात्रै कास्कीमा ३ सय ५२ जनाको परीक्षण गर्दा २ सय ५५ जनामा कोरोना पोजेटिभ देखिएको छ ।

प्रदेश राजधानी पोखरामा रहेको ५० शैयाको कोरोना विशेष अस्पतालमा बिरामीहरुलाई आइसीयू र भेन्टिलेटरकै अभाव हुन थालेको छ ।

कोरोना संक्रमितलाई लक्षित गर्दै पश्चिममाञ्चल क्षेत्रीय अस्पतालमा शुरु गरिएको अक्सिजन प्लान्ट जडान गर्ने काम अझै सकिएको छैन ।

जिल्ला स्वास्थ्य प्रमुख आचार्यकाअनुसार पोखराकै संक्रामक रोग तथा सरुवा रोग अस्पतालमा उपकरणहरु जोड्ने काम भइरहेको छ ।

मनाङ र मुस्ताङबाहेक प्रदेशका ९ जिल्लामा संक्रमित बढ्दै गएका छन् । प्रदेशमै परीक्षणको ५० बढी संक्रमित भेटिएका छन् । प्र्रदेश स्वास्थ्य निर्देशनालयको विवरणअनुसार पछिल्लो २४ घण्टामा १२ सय ६८ जनाको नमूना परीक्षण गर्दा ६ सय ५४ जनामा संक्रमण पुष्टी भएको छ ।

विहीबार तनहुँ जिल्लामा १ सय २ जनामा कोरोना पुष्टी हुँदा बाग्लुङ्मा ९७ जनालाई कोरोना पोजेटिभ देखिएको छ ।

यस्तै, नवलपरासीपूर्व ६३, स्याङ्जामा ५८, गोरखामा ३९, पर्वतमा २२, म्याग्दीमा १२ र लमजुङ्मा ६ जनामा विहीबार कोरोना संक्रमण पुष्टी भएको निर्देशनालयले जनाएको छ ।

कोभिशिल्डको दोस्रो डोज पाएनन्

विभिन्न देशहरुबाट कोरोना विरुद्धको खोप आउने क्रम जारी रहे पनि पहिलो खोप लगाएको महिनौं हुँदा पनि दोस्रो डोज खोप लगाउन अझै पाएका छैनन् ।

कास्कीमा कोरोना विरुद्धको कोभिशिल्ड खोप लगाएका ३२ हजार नागरिकले अझै दोस्रो डोज लगाउन पाएका छैनन् । कोभिशिल्ड खोप लगाएकालाई उनीहरुलाई दोस्रो डोज एक्स्ट्राजेनेका खोप लगाइने तयारी भइरहेको स्वास्थ्य प्रमुख आचार्यले बताए ।

भेरोसेल खोप लगाएका कतिपयले दोस्रो डोज लगाएर पूर्ण भइसक्दा कास्कीसहित प्रदेशका सबैजसो जिल्लामा महिनौं अघि कोभिशिल्ड खोप लगाएकाहरुले दोस्रो डोज पाएका छैनन् ।

पूर्वी नवलपरासीमा भने केही दिनअघिबाट कोभिशिल्ड लगाएका ्र्र६० वर्षमाथिकालाई एक्सट्राजेकेका खोप लगाउन शुरु गरिएको स्वास्थ्य कार्यालय नवलपुरले जनाएको छ ।

स्याङ्जामा आईसीयू नै छैन

प्रदेश सरकारले बालबालिकाको लागि मात्रै छुट्ट्रै आईसीयू स्थापना गर्ने भनिएको स्याङ्जा जिल्लामा अहिलेसम्म कुनै पनि आईसीयूको ब्यवस्था हुन सकेको छैन ।

आईसीयू र भेन्टिलेटरको अभाव हुँदा विरामीलाई पोखरा पठाउनु पर्ने बाध्यता रहेको स्याङजाकी जनस्वास्थ्य अधिकृत बसुन्धरा शर्माले बताइन् । जिल्लामा ८ सय भन्दा बढी सक्रिय संक्रमित छन् । जिल्लामा १३ जना बाहेक सबै संक्रमितहरु होम आइसोलेशनमा रहेको शर्माले बताइन् ।

जिल्ला अस्पतालमा छिट्ट्रै नै पीआइसीयू सञ्चालन गर्ने भनी गरिएको टेन्डर आन्तरिक समस्याले गर्ने पुनः रिटेण्डर गर्नुपरेको जनस्वास्थ्य अधिकृत शर्माले जानकारी दिइन् ।

प्रदेश सरकारले म्याग्दी, पर्वत र स्याङ्जामा बालबालिकाका लागि छुट्टै आइसीयू स्थापना गर्ने निर्णय गरेको थियो । तीन जिल्लामा बच्चाको आइसीयू सञ्चालन गर्न संघीय सरकारले तीन–तीन करोड रुपैयाँ बजेटसमेत छुट्याएको छ ।

गत असारमा स्याङ्जाको कालीगण्डकीमा २ जनालाई कोरोनाको डेल्टा भेरिन्यन्ट नै पुष्टी भएको थियो । पालिकाको सक्रियताको कारण उक्त भेरियन्ट फैलिन नपाएको शर्माले बताइन् ।

शर्माकाअनुसार जिल्लाको पालिकाहरु वालिङ, पुतलीबजार, गल्याङ, चापाकोटमा कोरोना संक्रमित बढिरहेका छन् ।

गण्डकी प्रदेशमा कोरोना संक्रमणबाट १ हजार १ सय ६१ जनाको मृत्यु भइसकेको छ ।