पोखरा

नेपाली कांग्रेसका केन्द्रीय सदस्य गगन थापाले सरकारले ल्याएको अध्यादेशको विरोध गरेका छन्।

संसद् अधिवेशन अन्त्य गरेर अध्यादेश ल्याउने काम जसले गरे पनि गलत भएको उनले सामाजिक सञ्जालमार्फत बताएका हुन्।

उनले सामाजिक सञ्जालमा फेसबुकमा लेख्दै यो कदम हिजो, आज र सँधै गलत हुने बताएका छन् । गतवर्ष यस्तै अध्यादेश ल्याउने कसैलाई पनि यसको विरोध गर्ने अधिकार नरहेको समेत उनले बताएका छन् ।

‘संसद् अधिवेशन हठात् अन्त्य गरेर संसद् छल्दै अध्यादेश ल्याउनु गलत! हिजो गलत, आज गलत, सधैँ गलत, जसले गरे पनि गलत! हिजो ओलीले ल्याउँदा गलत भन्ने, त्यसको विरुद्धमा उभिने कसैलाई पनि आज समर्थन गर्ने हक छैन/हुँदैन । समर्थन गर्ने भए त्यतिवेला विरोध गरेकोमा सार्वजनिक माफी माग्नुपर्छ।’ उनले भनेका छन्।