पोखरा

लमजुङको सुन्दरबजार नगरपालिका ९, सिउँडीबार चोकनजिकै धारापानीमा रहेको अधिकारी मोटरसाइकल वर्कसपमा आगलागी भएको छ ।

सोमबार बिहान पौने ५ बजेतिर आगलागी हुँदा वर्कसप सबै जलेको छ । डुम्रे-बेंसीसहर सडक खण्डको सिउँडीबार चोक नजिकै रहेको मोटरसाइकल वर्कसप नजिकैको बिजुलीको पोलको तार सर्ट भएपछि आगलागी भएको प्रहरीले जनाएको छ ।

जिल्ला प्रहरी कार्यालयका सूचना अधिकारी इन्सपेक्टर जगदीश रेग्मीका अनुसार सर्भिसिङका लागि ल्याएको एउटा मोटरसाइकल, २ वटा स्कुटरसहित ७ वटा पुरानो मोटरसाइकल जलेर पूर्णरुपमा नष्ट भएको छ ।

उनका अनुसार प्रहरी र स्थानीयको सहयोगमा बिहान सवा ५ बजेतिर आगो नियन्त्रणमा आएको थियो । आगलागीबाट मानवीय, पशुचौपायको क्षति नभए पनि अन्दाजी ५ लाख रुपैयाँ बराबरको सामग्री जलेर नष्ट भएको प्रहरीले जनाएको छ ।