पोखरा

भदौ ३० गतेदेखि पोखरा महानगरपालिका वडा नं. १२ स्थित कास्की सेवा हस्पिटल एण्ड रिसर्च सेन्टर प्रालिले डेंगु रोग नियन्त्रणका लागि डेंगुरोगको परीक्षण निःशुल्करुपमा गर्ने भएको छ । 

अस्पतालले सामाजिक उत्तरदायित्वलाई मध्यनजर गर्दै आर्थिक अभावका कारण डेंगु रोग परीक्षण गर्नबाट कोही पनि बञ्चित नहुन् भन्ने उद्देश्यले निःशुल्क परीक्षण गर्न लागिएको प्रमुख कार्यकारी अधिकृत युवराज आचार्यले बताए ।

निजी स्वास्थ्य संस्थामा डेंगु रोग परीक्षण गर्न न्यूनतम १२ सय रुपैयाँ लाग्ने गरेको छ । निःशुल्क परीक्षणका लागि डेंगुको लक्षण भएकालाई अस्पतालकै फिजिसियले अनिवार्य सिफारिस गर्नुपर्ने हुन्छ । अस्पतालले एक हजार बिरामीलाई आवश्यक किट उपलब्ध गराउने प्रशासकीय अधिकृत सुन्दर पोखरेलले जानकारी दिए ।