पोखरा

अफ्रिकी मुलुक नाइजेरियाको कोगी राज्यको फेले क्षेत्रस्थित सेलेस्टियल चर्च अफ क्राइस्टमा आयोजित एक कार्यक्रमका क्रममा अज्ञात बन्दुकधारीहरुको समूहले आइतबार अबेर राति आक्रमण गर्दा दुई जनाको मृत्यु भएको छ । आक्रमणमा केही घाइते भएका नाइजेरियाली प्रहरीले जनाएको छ ।

मारिने दुबै श्रद्धालुहरु महिला रहेको जनाइएको छ । आक्रमणमा घाइते भएकाहरुको उपचार भइरहेको समेत प्रहरीले जनाएको छ । आक्रमणपछि घटनास्थलमा प्रहरी पुगेपछि बन्दुकधारी फरार भएका थिए ।

धार्मिक कार्यक्रममा भाग लिइरहेका श्रद्धालुहरूलाई लक्षित गरी बन्दुकधारीले अन्धाधुन्ध गोली प्रहार गरेको प्रान्तीय राजधानी लोकोजामा राज्यका प्रहरी प्रवक्ता विलियम ओभिए–आयाले बताएका छन् ।

आक्रमणकारीको खोजी भइरहेको र मृतकहरुलाई शवगृहमा राखिएको प्रहरीको भनाइ छ । अहिलेसम्म आक्रमणकारीहरु पक्राउ परेको घोषणा गरिएको छैन ।नाइजेरियामा पछिल्लो समय धार्मिक एवम् जातीय हिंसा बढ्दै गएको बताइन्छ ।