पोखरा

अंग्रेजी नयाँ वर्षको ‘ब्रान्ड’ बनेको पोखरा सडक महोत्सवको तयारी पूरा भएको छ ।

रेस्टुरेन्ट एन्ड बार एसोसिएसन अफ नेपाल (रेवान) पोखराद्वारा आयोजित २४ औं संस्करणको महोत्सव बुधबारदेखि सुरु हुँदै छ । महोत्सव ५ दिनसम्म चल्नेछ । सडकमै खाऔं, सडकमै नाचौं र रमाऔं भन्ने नारासाथ आन्तरिक तथा बाह्य पर्यटन प्रवर्द्धन गर्ने उद्देश्यले रेवान पोखराले महोत्सव गर्दै आएको छ ।

लेकसाडइको फिस्टेल गेटदेखि खहरेचोक हुँदै जरेवरसम्म हुने महोत्सवको तयारी पूरा भएको आयोजक रेवान पोखराका अध्यक्ष नरेशबहादुर भट्टराईले सोमबार पत्रकार सम्मेलनमा जनाए । महोत्सवले कोरोनापछि शून्य रहेको पर्यटन क्षेत्रलाई चलायमान बनाउने विश्वास उनले गरे ।

साथै लोपोन्मुख भेषभूषा, कला, संस्कृति, ग्रामीण भेगमा उत्पादित घरेलु सामग्रीको संरक्षण र प्रवर्द्धन, पर्यटन क्षेत्रले विदेशी मुद्रा आर्जन, आर्थिक क्रियाकलाप अभिवृद्धि तथा समग्र आर्थिक विकास र समुन्नतिमा सहयोग पुग्ने आशा लिइएको उनले जनाए ।

महोत्सवका बेला सडकमा अत्यावश्यक सवारी साधनलाई अवरोध नहुने गरी स्वदेशी तथा खाना प्रवर्द्धन, ग्रामीण भेगका कृषि तथा फलफूल प्रदर्शन, लोपोन्मुख सांस्कृतिक कार्यक्रम, खेलकुद, दोहोरी र लाइभ कन्सर्ट हुने बताइएको छ । सडकमा दैनिक राई र लिम्बूको च्याब्रुङ र साकेला नृत्य, भैरव पूजा, तयामचा, लाखे, घाँटु, सोरठी, छेडु, तामाङ सेलो, कौरा, मारुनी, रोदी, झाम्रो नाँच देखाइनेछ । थारुजातिको संस्कृति र पंचेबाजा पनि महोत्सवमा घन्किनेछन् ।

कोमागाने पार्कमा दिनभर लोकदोहोरी र राति लाइभ कन्सर्ट हुनेछ । गौरीघाट, सेन्टर प्वाइन्ट र खहरेमा सांस्कृतिक नृत्य साँझ, रात्रिकालीन बसको व्यवस्था पनि गरिएको छ । सहिद चोक र डिहीको पाटनदेखि बगर, लामाचौर, अमरसिंहचोकसम्म राती ११ बजेसम्म र पुस १५ र १६ मा अवेरसम्म सवारी साधन चल्नेछन । ‘पर्यटन चलायमान बनाउने मुख्य उद्देश्य हो’ भट्टराइले भने, ‘पाहुनाको स्वागत गर्न पर्यटन व्यवसायी तयार रहेको सन्देश यसले दिनेछ ।’